ADD TO PRINT

(26 ഏപ്രിൽ 2013, വേദവായന : നടപടി  13 : 26  - 33  , യോഹന്നാൻ 14  :1- 6 )

 

               വിശ്വാസത്തിന്റെ സഞ്ചാരം അന്യഥാത്വത്തിന്റെ വിരഹാവസ്ഥയല്ല  (the journey of faith is not alienation) . പ്രത്യുത , ദൈവത്തിന്റെ വിശിഷ്ടമായ മുഖം കാണാനുള്ള ഒരുക്കമാണ് . ഇന്നത്തെ സുവിശേഷം യേശു ശിഷ്യൻമാരോട് പറഞ്ഞ വചനത്തിലേക്കു നമ്മെ തിരിച്ചു കൊണ്ടുവരുന്നു : “നിങ്ങളുടെ ഹൃദയം അസ്വസ്ഥമാകേണ്ട” . യേശുവിന്റെ ഈ  വചനങ്ങൾ ഉത്കൃഷ്ടമായ വചസ്സുകളാണ് . 

 

            യാത്രാമൊഴിയുടെ പശ്ചാത്തലത്തിൽ യേശു ശിഷ്യന്മാരോടു സംസാരിക്കുന്നു . ഹൃദയത്തിൽ നിന്ന് വരുന്ന വാക്കുകൾ  കൊണ്ടാണ് അവൻ സംസാരിക്കുന്നത് . തന്റെ ശിഷ്യന്മാർ ദുഖിതരാണെന്ന് യേശുവിന് അറിയാം . കാര്യങ്ങൾ അത്ര നന്നായി പോകുന്നില്ലെന്ന് അവർക്കറിയാം . എന്നാൽ , യേശു പറയുന്നു : “നിങ്ങളുടെ ഹൃദയം അസ്വസ്ഥമാകാൻ അനുവദിക്കരുത്” . ഒരു സുഹൃത്തിനെ പോലെ , ഒരു നല്ല ഇടയനെ പോലെ ,അവൻ സംസാരിക്കുന്നു . ഞാൻ പറയുന്നു , യേശുവിന്റെ ഈ വാക്കുകളുടെ സംഗീതാത്മകത അജപാലകന്റെ മനോഭാവമാണ് വെളിപ്പെടുത്തുന്നത് . അത് ഇടയൻ ആടുകളോട് സംസാരിക്കുന്നതു പോലെയാണ് . അല്ലേ ?..... “നിങ്ങളുടെ ഹൃദയം  അസ്വസ്ഥമാകാൻ അനുവദിക്കരുത് .ദൈവത്തിൽ വിശ്വസിക്കുവിൻ.” പിന്നെ അവൻ എന്നതിനെക്കുറിച്ചാണ് സംസാരിച്ചത് ? സ്വർഗ്ഗം നമ്മുടെ സുനിശ്ചിത ജന്മദേശം .

            

            “എന്നിലും വിശ്വസിക്കുവിൻ.” ഞാൻ എന്നും വിശ്വസ്തൻ ആണ് . അങ്ങനെയാണ് അവൻ പറയുന്നത് അല്ലെ ? …. ഒരു യന്ത്രവിദഗ്ദ്ധനെപ്പോലെ , ഒരു ശില്പിയെപ്പോലെ , താൻ എന്താണ് ചെയ്യാൻ പോകുന്നതെന്ന് യേശു വ്യക്തമാക്കുന്നു :  ഞാൻ നിങ്ങൾക്ക് ഒരു മുറി ഒരുക്കാൻ പോകുന്നു . എന്റെ പിതാവിന്റെ ഭവനത്തിൽ ധാരാളം മുറികളുണ്ട് .യേശു നമുക്ക് ഒരു മുറി ഒരുക്കാൻ പോകുന്നു .സ്ഥലം എങ്ങനെയിരിക്കും ? നിങ്ങൾക്ക് സ്ഥലമൊരുക്കുക എന്നു പറഞ്ഞാൽ എന്താണ് അർത്ഥം ? അവിടെ ഒരു മുറി വാടകയ്ക്ക് എടുക്കുകയാണോ ?  സ്ഥലമൊരുക്കുക എന്നുപറഞ്ഞാൽ ആനന്ദിക്കാനുള്ള സാധ്യത തയ്യാറാക്കുക . സാധ്യത , നമ്മുടെ സാധ്യത ,നമ്മെ കാത്തിരിക്കുന്ന സൗന്ദര്യത്തെ കാണാൻ , അനുഭവിക്കാൻ , ഗ്രഹിക്കാനുള്ള സാധ്യത . നാം എവിടേക്കാണോ നടക്കുന്നത് ആ ജന്മദേശത്തിന്റെ സൗന്ദര്യം ആസ്വദിക്കാനുള്ള സാധ്യത ക്രൈസ്തവ ജീവിതം മുഴുവൻ യേശുവും  പരിശുദ്ധാന്മാവും നമ്മുക്കൊരു മുറിയൊരുക്കുന്ന ജോലിയിലാണ് . അത് കാണാനായി നമ്മുടെ കണ്ണുകളെ ഒരുക്കുന്ന ജോലി ….

     

            എന്നാൽ , പരിശുദ്ധ പിതാവേ , എനിക്ക് നന്നായി കാണാം …. എനിക്ക് കണ്ണടകൾ  വേണ്ടാ ! പിന്നെ എന്തിനാണ് എന്റെ കണ്ണുകൾ ഒരുക്കുന്നത് ? ഇത് വേറൊരു തരം കാഴ്ചയാണ് ….. തിമിരം ഉള്ളവരെക്കുറിച്ചു ചിന്തിക്കൂ .  തിമിരം മാറാനായി ഓപ്പറേഷന് വിധേയരായവരെക്കുറിച്ചു ചിന്തിക്കൂ . അവർ കാണുന്നു എന്നാൽ , ഓപ്പറേഷന് ശേഷം എന്താണ് അവർ പറയുന്നത് ? കണ്ണടകളില്ലാതെ ഇത്ര നന്നായി കാണാൻ സാധിക്കുമെന്ന് ഞാൻ വിചാരിച്ചില്ല . എത്ര വ്യക്തമായിട്ടാണ് ഞാൻ ഇപ്പോൾ കാണുന്നത് . നമ്മുടെ കണ്ണുകൾ , ആത്മാവിന്റെ കണ്ണുകൾ - യേശുവിന്റെ ഉത്കൃഷ്ടമായ മുഖം കാണാൻ അവയെ ഒരുക്കേണ്ടതുണ്ട് . സുന്ദരമായ കാര്യങ്ങൾ കേൾക്കാൻ , സുന്ദരമായ വചനങ്ങൾ  കേൾക്കാൻ കാതുകളെ  ഒരുക്കേണ്ടതുണ്ട് . എന്നാൽ , ഏറ്റവും ആദ്യം ഹൃദയത്തെ  ഒരുക്കേണ്ടതുണ്ട് . 

 

                   ജീവിതയാത്രയിൽ കർത്താവ് നമ്മുടെ ഹൃദയത്തെ ഒരുക്കുന്നത് പീഡനങ്ങൾ കൊണ്ടും സാന്ത്വനങ്ങൾ കൊണ്ടുമാണ് , ക്ലേശങ്ങൾകൊണ്ടും നല്ല കാര്യങ്ങൾകൊണ്ടുമാണ് .  ജീവിതയാത്ര മുഴുവൻ ഒരുക്കയാത്രയാണ് . ചിലപ്പോൾ കർത്താവ് അത് ധൃതിയിൽ ചെയ്യുന്നു . നല്ല കള്ളന്റെ കാര്യത്തിൽ സംഭവിച്ചത് അതാണ് . ഒരുങ്ങാൻ ഏതാനുംനിമിഷമേഅയാൾക്ക് കിട്ടിയുള്ളൂ. അവൻ ഒരുങ്ങുകയും ചെയ്തു സാധാരണയായി , ഒരു ജീവിതം മുഴുവനുണ്ട് നമ്മുടെ ഹൃദയത്തെ ഒരുക്കാൻ .നമ്മുടെ ജന്മദേശത്ത് എത്തിച്ചേരാൻ ഒരു മുഴുവനുമുണ്ട് ,ഇല്ലേ ? കാരണം , അതാണ് നമ്മുടെ ജന്മദേശം .

 

              പക്ഷേ , പരിശുദ്ധ പിതാവേ , ഞാൻ ഒരു തത്ത്വ ജ്ഞാനിയെ കണ്ടു . അയാൾ എന്നോട് പറഞ്ഞു “ ഇത്തരം ചിന്ത ഒരു തരം അന്യഥാവത്കരണമാണ് . നാം നമ്മുടെ സ്വന്തം നാടായ ഈ ഭൂമിയിൽ ഒറ്റപ്പെടുകയാണ് . ഈ ചിന്ത നമ്മെ ഇവിടെ പരദേശികളാക്കുകയാണ് . വാസ്തവത്തിൽ ഈ ജീവിതമാണ് ശരി . ഇതാണ് ജീവിതം , മൂർത്തമായ ജീവിതം ഇതിനപ്പുറത്ത് എന്താണുള്ളതെന്ന് ആർക്കും അറിയില്ല ഇങ്ങനെ ചിന്തിക്കുന്ന ആളുകളുണ്ട് . എന്നാൽ അത് ശരിയല്ലെന്ന് യേശു പഠിപ്പിക്കുന്നു . അവൻ നമ്മോടു പറയുന്നു : എന്നിൽ വിശ്വസിക്കുവിൻ ഞാൻ നിങ്ങളോടു പറയുന്നതാണ് സത്യം . ഞാൻ നിങ്ങളെ പറ്റിക്കുകയില്ല . ഞാൻ നിങ്ങളെ വിഡ്ഢികളാക്കുകയില്ല . സ്വർഗ്ഗത്തിനായി നമ്മെ ഒരുക്കുക എന്ന് പറഞ്ഞാൽ വളരെ ദൂരെ നിന്ന് തന്നെ ഒരുക്കം ആരംഭിക്കണം എന്ന് സാരം . ഇത് അന്യഥാവത്കരണമല്ല . നാം ഭൂമിയിൽ ഒറ്റപ്പെടുത്തപ്പെടുകയോ ഈ ലോകത്തിനു നമ്മെ പരദേശികളാക്കുകയോ അല്ല .ഇതാണ് സത്യം , നമ്മുടെ ഹൃദയത്തെ ഒരുക്കാൻ യേശുവിനെ അനുവദിക്കുക . ആ മനോഹരമായ കാഴ്ച കാണാൻ കണ്ണുകളെ ഒരുക്കുക .ഇതാണ് സൗന്ദര്യത്തിലേക്കുള്ള വഴി ജന്മദേശത്തേക്കു തിരിച്ചുപോകാനുള്ള വഴി . ഈ ശക്തമായ ധൈര്യം തരാൻ കർത്താവിനോടു നമ്മുക്ക് പ്രാർത്ഥിക്കാം . നമ്മുടെ ഹൃത്തിൽ ,നമ്മുടെ കണ്ണുകളിൽ , നമ്മുടെ കാതുകളിൽ സുനിശ്ചിതമായ ആ സ്ഥലം ഒരുക്കാൻ കർത്താവിനെ അനുവദിക്കാനുള്ള ധൈര്യവും വിനയവും തരാൻ  നമ്മുക്ക് പ്രാർത്ഥിക്കാം .

 

for further details : https://www.youtube.com/watch?v=dEyp0tpZ1mY&list=PLaUtZ3dvlFuaqWbVWwEDwQstxTQKRbYWf&index=24

LOGIN TO REPOST THIS NEWS